Adrak ki Kheti Kaise Kare – Jankari Hindi Me अदरक की खेती कैसे करे


Adrak ki Kheti Kaise Kare

Adrak ki Kheti Kaise Kare

Adrak ki Kheti Kaise Kare – अदरक की खेती

Adrak ek bahut hi upyogi fasal hai jiska prayog masalon tatha aushadhi ke ke liye kiya jata hai. Adrak pachan shakti ko badhane mein to labh dayak hai hi, iskay saath hi sardi, jukham aadi hone par bhi adrak ke kade ka upyog kiya jaata hai. Isliye hi Adrak bazar mein acchi kimat par bech jata hai aur isay ugana aasan hai. Isliye adrak ki kheti ek fayada dene wala karya hai. Aaiye jaane ki adrak ki kheti kaise ki jaaye. Adrak ki Kheti Kaise Kare.

Adrak ki kheti ke liye mausam ka chayan

Adrak garm aur nami yukt vatavaran mein ugta hai. Adrak ke paudhe adhik thand sahan nahin kar pate hain. Isliye adrak ko aisay samy ugana chahiye jab sardi ja rahi ho aur basant ka mausam shuru ho raha ho. Yani adrak ko lagane ka sahi mahina february aur march hai.

Ropan ke liye adrak ki tayari

Adrak ke bahut se paudhe ugane ke liye bade se adrak ko chote tukdon mein tod len. Adrak ke tukde 1 inch aakar ke hona chahiye. Aisa dhyan rakhen adrak ke tukdon ko is prakar toden ki uskay pratyek tukdde mein 2 se 3 aankhen ho arthat woh kala ghera ho jahan se ankur footega. Aisa karne ke baad adrak ko kuch din dhoop mein sukhayen aur uskay baad hi unka ropan karen. Adrak ke ropn mein adrak ki matra khet par nirbhar karti hai. Lagbhag 40 hazar varg feet ke khet ke liye 500 kilogram adrak kafi hota hai.

Mitti ki tayari

Adrak ki kheti karne ke liye khet ki mitti tayar karen. Khet ki mitti mein kahd ko milayen jisse mitti upjaoo ho sake. Mitti ka pH maan 6.5 se 7 ke beech hona chahiye.  Iskay saath hi mitti mein kuch matra mein neem ka powder dal den jisse ki adrak ko mitti mein rehne wale keede nuksaan nahin pahuncha saken.

Khet mein adrak ka ropan

Kheton mein adrak ko panktiyon ya kyariyon mein boya jaata hai. Do kyariyon ke beech ki doori 75 cm honi chahiye tatha do adrak ke beech ki doori 25 centimeter honi chahiye jisse ki adrak ko zameen ke andar failne ke liye jagah mil sake.

Fasla ki Sinchai

Khet mein adrak ke bone ke turan baad hi usmay pani dalkar uski sinchai karen jisse ki mitti adrak ke aas paas vyavasthit ho jaaye aur adrak ko anukulan ki isthiti prapt ho. Adrak ko bone ke baad usay tez dhoop ya tez barish se bachana chahiye. Adraka mein ankuran 10 se 20 dinon mein hota hai. Adrak bone ke baad 5 se 10 din ke antar se uski sinchai karni chahiye.

Ghans foos ki katai chatai

Adrak ki fasal ke saath hi ghaas foos bhi ugati hai. Usay hatana zaroori hota hai kyonki woh adrak ki fasal ko failne nahin dete. Ghaas foos ko fasal ke dauraan kam se kam do baar hatana chahiye.

Adrak ki tayar fasal

Adrak ki fasal 8 se 10 mahine mein tayar hoti hai jo ki adrak ki prajati par nirbhar karti hai. Adrak ki faal jab tayar ho jaati hai to adrak ki pattiyan peeli pad jaati hain aur uska tana sukh jata hai. Aisay samay mein adrak ki sinchai karna band kar den jisse ki adrak ki fasal puri tarah sookh jaaye. Adrak ke tane ke puri tarah sookh jaane par adrak ko mitti se khod kar nikala jaata hai.

Adrak ka rakh rakhav

Adrak ko nikal kar pani mein dal den jisse ki uskay upar lagi mitti hat jaaye. Iskay baad adrak ko 2 se 3 din dhoop dikhayen jisse ki adrak ki fasal puri tarah se upyog karne ke liye tayar ho jaaye. Adrak ko chamkdaar aur chikne banane ki liye isay halke haath se boriyon par bhi ghis sakte hain. 40 hazar varg feet ke khet mein lagbhag 8 se 10 ton tak adrak prapt hota hai. Adrak ke is fasal se phir se bone ke liye agar kuch adrak sambhal kar rakhne hai to kisi ped ki chaon mein boriyon mein bharkar usay rakhen. Yeh dhyan rakhen ki adrak jahan bhi rakha ho who sthan sukha ho aur wahan pani ki matra bilku nahin ho.

Kheti Karne Ke Different Types Details.

Easy Life Tricks
Sponsored Channel
Mr Hindi Indian Youtube Channel